زراعة الشعر في شيراز

السلام عليكم ورحمة الله وبركاته

الحمدلله رجعت أمس من شيراز بعد ما خلصت عملية زراعة الشعر في عيادة أريان. راح أكتب تقرير مفصل انشاءالله عن العميلة بالسلبيات والايجابيات. وراح أكتب باللهجه العاميه الكويتيه أريح لي.

العيادة: أريان كلينيك في شيراز ايران (الوكيل في الكويت هو عيادة بادرا انترناشيونال)
نوع العملية: زراعة الشعر بعملية الافتطاف الحديثة باستخدام الجهاز, يوفرلك وقت والأهم ان هالطريقة(على حسب أحد الأخوة اللي معاي) يتم فيها شطر البصيلة فتتفرع الى أكثر من شعره عند الزراعة.
السعر : 817 دينار كويتي/2900 دولار أمريكي تقريبا. شامل ( العملية, تذاكر الطيران, السكن,الفيزا, وجبتين يوميا, مترجم ومرافق, مواصلات, علاج وجلسات ليزر بعد العملية ل6 أشهر)
عدد الأيام: 5 أيام سفر, 3 أيام زراعة
عدد البصيلات: والله مادري هههه لأن طريقة العيادة هذي غير. تدفع المبلغ ويزرع أكثر عدد شعر مقدور عليه.

التفاصيل:-

اليوم الأول: هو يوم الوصول استقبلني ريال اهوازي اسمه بو حسين قمة في الاخلاق . رحت العياده سحبوا مني دم وبعدها رحنا تغدينا. بعد ما كلينا جلو كباب وداني الفندق مستواه طيب والله.

اليوم الثاني: تريقت وخذوني للعيادة الساعه 8 وتعرفت على باجي الشباب ودشينا عالدكتور حدد بالقلم مكان الزراعة والظاهر ان منطقة البنك عندي جيدة. قرعوني ودشيت غرفة العملية. طبعا اهي مو غرفة عمليات اهي ديوانية ههههه. غرفة كبيرة فيها تقريبا 10 سراير كل سرير تشتغل فيه نيرس ايرانية. الوضع حاطين اغاني ايرانية والشباب والنيرسات طايحليه سوالف هههه. بالنسبة لي الوضع أوكي لانه يقلل التوتر. بس للأمانه حرصهم كبييييييييير عالنظافة والتعقيم والشغل. لبست لبس العملية وانسدحت .المهم ابر البنج شوي ضايقتني بس شنسوي بعد. المصيبة بعد العملية حالتي الصحية انتكست. دخت وصرت ارجف. نمت في العيادة نص ساعه بعدين ودوني الفندق انسدحت بالفراش حوالي ال 13 ساعة ماني قادر أقوم. حاولت اكل قبلها مع اني مو يوعان بس ايدي ترجف فكليت شويه ونمت. السبب لاني فقدت وايد دم وانا حامل مرض التكسر بالدم. (5 ساعات)

اليوم الثالث: الوضع شوي أحسن بس أحس اني استمرضت. حضرتها اللي تشتغل على راسي كانت نايمه بالبيت فالعياده دقوا عليها يصحونها هههه. نطرت يمكن ساعه الا ربع على ما بلشت. نفس اجرائات اليوم اللي قبله بالضبط بس حمدلله ما تعبت مثل اليوم اللي قبله. بعد العمليه تغدينا. وطبعا بنص العملية يعطونك عصاير وحلو عشان تعوض دم. (5 ساعات)

اليوم الرابع: كان يوم مهلك خصوصا حقي انا لان المنطقة المانحه عندي جيدة فحاولوا يسحبون شعر قد ما يقدرون لانه اليوم الاخير. يعني بدال الجلسه صارت جلستين بيوم واحد. الشباب كلهم ردوا الفندق الى انا ظلوا يلعبون فيني دوري. (10 ساعات) بالليل ردينا العيادة مرة ثانية عشان ابر البي ار بي. طبعا مو محسويه بالعملية سعرها 100 دينار كويتي.

اليوم الخامس: كنت نايم 12 ساعه بس تعبان لي الحين. دشيت الحمام تكرمون دخت حييل وطحت غشيان عالبانيو ههههه الله ستر. شوي شوي صرت احسن وبعدين رحنا المطار وردينا الديرة.

التجربة بشكل عام قد تختلف من شخص لي شخص. يعني انا تعبت أكثر من غيري لظروف خاصة. باجي الشباب ارهاق عادي وكانوا يطلعون بالليل يتمشون مو مثلي. الايرانيين ناس محترمييييييين لأقصى حد وطيبين. وبو حسين ما قصر معاي. ما أقدر أحكم على جودة الشغل لاني ما زرت عيادات ثانية. ومع ان الوضع داخل غرفة الزراعه ضحك وسوالف, بس والله لو تشوفهم شلون كل شوي يشاورون بعض عشان يطلعون بنتيجة حلوة تحس انهم عارفين شغلهم بس مشكلتهم ان مو كلهم يعرفون انجليزي او عربي. وطبعا بين فترة وفترة الدكتور يطمن على كل واحد فينا ويشوف الأوضاع. هذا كل اللي عندي الحين يمكن نسيت شي مادري او في اغلاط املائية لاني ما راجعت ههه. راح أحط صور قبل و بعد العملية. وانشاءالله كل 12 الشهر أحط صورة

المصدر : www.hairfars.com